Kerido Studiante,
Pa por papia, skirbi y siña Papiamento bon y compronde e reglanan di Papiamento, ta necesario pa haya les di Papiamento.
Papiamento a drenta scol secundario na aña 2003 na Aruba como materia. Hopi di nos no a haya Papiamento como materia na scol, nos tur por papia of ta purba papia Papiamento. Pero e skirbimento ta bira dificil mescos tambe e parti di gramatica.Ta p'esey ta comprendibel cu e dominio di e reglanan di ortografia y gramatica no ta ainda unda e mester ta.
Den e curso aki a prepara les di Papiamento cortico caminda lo trata e historia di Papiamento, Ortografia y diferente tema gramatical.
Papiamento, Nos idioma https://www.youtube.com/watch?v=VMp4HkuThlg&t=0s&list=PLHCGJCxFjBSZqNmhAmhNEbnPTCCzsyca0&index=1
Den e les di Papiamento lo cubri splicacion basico di lo sogiuente:
Historia: Con papiamento a origina? Papiamento ta un idiona cu a pasa den un desaroyo unico y tin su derecho di existencia. Tres carta lo woro trata cu tin respectivamente dos shen y pico aña bieu.
Gramatica: E sistema di regla cu un idioma tin pa forma palabra, combina nan y uza nan den frase.
Morfologia: Ta studia structura, formacion, funcion y nificacion di palabra di un idioma.
Sintaxis: ta studia con ta ordena, coordina y subordina e palabranan y e relacionnan cu e palabra aki tin den un frase.
Ortografia: Ta palabracion con pa skirbi un palabra corectamente. Nos ta bay wak con nan tabata skirbi antes y con Papiamento a desaroya cu tempo. E alfabet di Papiamento no ta mescos cu esun di Hulandes: e tin 27 letter. Cua ta e letter extra? Nos ta bay siña tambe di digrafo, numeral y contraccion.
Tambe nos lo trata palabra fia di otro idioma, uzo di "wordo", verbo, particula di tempo presente, pasado y tempo futuro, sustantivo, adhetivo, adverbio, pronomber, conhuncion, articulo defini y articulo indefini, plural, interheccion y preposicion.
Ta spera cu e splicacion basico lo por ta di gran yudansa.
